बुक्काउवोल्फ सोसायटी, खरडवाडी येथे वृक्षतोड प्रकरण; स्थानिकांमध्ये संताप

पिंपरी-चिंचवड, पुणे : बुक्काउवोल्फ सोसायटी, खरडवाडी, पिंपरी, पुणे-18 येथे कथितरित्या अनधिकृत वृक्षतोड करण्यात येत असल्याचा गंभीर आरोप स्थानिक नागरिकांनी केला आहे. प्राप्त माहितीनुसार काही झाडे पूर्णपणे तोडण्यात आली असून काही वृक्ष अर्धवट कापून नैसर्गिक वाऱ्यामुळे पडतील अशा स्थितीत ठेवण्यात आल्याचा आरोप करण्यात येत आहे.
स्थानिक नागरिकांच्या म्हणण्यानुसार, हे कृत्य सोसायटीचे चेअरमन विजय लोखंडे व सचिव विकास आहेर यांच्या आदेशाने होत असल्याची माहिती समोर आली आहे. विशेष म्हणजे, सोसायटीशी संबंधित काही वाद न्यायालयात प्रलंबित असताना अशा प्रकारची कारवाई करण्यात येत असल्याने अनेक प्रश्न उपस्थित होत आहेत.
नागरिकांनी संबंधित प्रशासन, वन विभाग व महापालिका यांनी या प्रकरणाची सखोल चौकशी करून दोषींवर कठोर कारवाई करावी, अशी मागणी केली आहे. पर्यावरणाचे नुकसान करणाऱ्या अशा प्रकारच्या घटनांवर तातडीने आळा घालणे आवश्यक असल्याचे मतही नागरिकांनी व्यक्त केले आहे.
या प्रकरणात पूर्वी अस्तित्वात असलेल्या झाडांची स्थिती आणि सध्या झालेल्या वृक्षतोडीची छायाचित्रे पाहिल्यास मोठ्या प्रमाणात बदल झाल्याचे स्पष्टपणे दिसून येत असल्याचा दावा स्थानिक रहिवाशांनी केला आहे.
(टीप : संबंधित व्यक्तींवर करण्यात आलेले आरोप स्थानिक नागरिकांकडून प्राप्त माहितीनुसार असून, अधिकृत चौकशीनंतरच अंतिम सत्य समोर येईल.)